ઉડવું છે;

ઉડવું છે; પછી જોઉં કે કોણ ચપટી મારીને હેઠું પાડે છે.

- ભાર્ગવ મકવાણા 

AMTS

AMTS અમદાવાદ મ્યુનિસિપલ કોર્પોરેશન ટ્રાન્સપોર્ટ સર્વિસની બસો જે સરકારી બસો છે પરંતુ કોઈ ચોક્કસ રાજકીય પાર્ટીની બસો નથી તેવું આપણે સૌ જાણીએ છીએ અને માન્ય પણ છે. પરંતુ સંજોગોવશ ઘણા એવા તારણો ઊભરી આવે છે જેથી ક્યારેક તો એવું લાગે કે આ બસો કોઈ ચોક્કસ રાજકીય પાર્ટી એ મુકાવેલી હોય જ્યારે જ્યારે કોઈ રાજકીય નેતા અમદાવાદમાં આવતા હોય ત્યારે આ બસો પોતાની આખી દિનચર્યાથી વિરુદ્ધમાં કામ કરે છે કે તેમની પાસે કરાવવામાં આવતું હોઈ છે. હાલ જ્યારે ગુજરાતમાં 36 માં રાષ્ટ્રીય રમત ઉત્સવના ઉદ્ઘાટનનો કાર્યક્રમ યોજાયો હતો ત્યારે બધી બસોને મોદીજીના કાર્યક્રમ માટે મૂકવામાં આવી હતી અને ત્યારે એક દિવસમાં માત્ર બસોનો ખર્ચ 74 લાખની આસપાસ આવ્યો હતો. એ બધું તો ઠીક પરંતુ આવા સમયે રોજ બસ માં અપડાઉન કરતા લોકોને હાલાકી પડી હતી. બસોને પોતાના કાર્યક્રમમાં ગોઠવ્યા બાદ પણ બીજી કોઈ વૈકલ્પિક વ્યવસ્થા કરવામાં આવેલ ન હતી. 

આશ્ચર્યની વાત તો ત્યાં છે જ્યારે આ બસો ઉપર ભાજપના પોસ્ટરો લગાડવામાં આવેલા છે.

ફાટેલી નોટો લેનાર

છબી - ભાર્ગવ મકવાણા

સ્થળ - શહીદ ચોક (અમદાવાદ)

આજ રોજ શહીદ ચોક પર એક લારી માં એક કાકા ને સિંગ વેચતા જોયા વરસાદ રિમઝિમ ચાલુ હતો મારું મન પણ સિંગ ખાવા નું મન થયું. કાકા પાસે ગયો સિંગ લેતા ત્યાં લગાવેલ બોર્ડ પર મારી નજર ગઈ તે બોર્ડ માં લખ્યું હતું "ફાટેલી નોટ લેનાર" આવા બોર્ડ વાંચી આશ્ચર્ય સર્જાય સ્વભાવિક છે. કાકા ખૂબ મજાના માણસ હતા એટલે તો પછી કાકા સાથે ઘણી વાત કરી અને વાત- વાતમાં જાણવા મળ્યું કે આજુ બાજુ ઘણી જગ્યાએ થોડી ફાટેલી નોટો પણ ચલાવતા નથી તો કાકા એ વિચાર્યું કે આવી નોટો બેંક તો સંભાળે છે તો આવો બોર્ડ લગાવી ને લોકો ફાટેલી નોટો ના બદલામાં સિંગ લેતા થયા અને કાકા નો ધંધો પણ ગતિ પામ્યો. #કાકા ની માર્કેટિંગ પોલિસી 

વિવેકાનંદ અને ભગત સિંહ

આજના વૈચારિક યુગમાં પણ યુવાનોને જેના ઉદાહરણો આપવામાં આવે તેવી વ્યક્તિ એટલે સ્વામી વિવેકાનંદ અને ભગત સિંહ. જ્યારે સ્વામી વિવેકાનંદના જન્મદિવસ દિવસે તો રાષ્ટ્રીય યુવા દિવસ ઉજવવામાં આવે છે. અને ભગત સિંહ જ્યારે ફાંસી પર ચડ્યા તે દિવસને શહીદ દિવસ તરીકે ઓળખવામાં આવે છે. આ વ્યક્તિઓએ દેશ માટે ઘણું બધું કર્યું, પણ શું આપણે તેમનું સન્માન જાળવી શક્યા ખરા .? એ એક પ્રશ્ન છે પોતાની જાત ને પૂછવો જ જોઈએ...

આજે દેશના યુવાનોમાં જોવાતી મોટી સમસ્યા એટલે વ્યસન. વ્યસનના લીધે તો કેટલા પરિવારો રજળતા બન્યા છે કેટલી માં એ પોતાના જુવાન દિકરા- દિકરી ખોયા છે. આજે જેમ આપણે જોઈએ છીએ વ્યસનના વેચાણ માટે તો ઘણા ચહિતા કલાકારો પણ આજ કાલ પ્રચાર માટે આવે છે. તે તેમનો વ્યક્તિગત નિર્ણય છે તેમની ઈચ્છા ની વાત છે તેમાં ન પડયે.

    પરંતુ આવા જીવલેણાં પદાર્થને વિવેકાનંદ અને ભગત સિંહના ફોટા લગાવી વેચવા એ તો યોગ્ય ન કહેવાય, આપડા માટે ખુબજ શરમ જનક બાબત છે અને તેમનું અપમાન છે. 

એકતા અને અખંડિતતાનું ઉત્તમ ઉદાહરણ - ભારત

એકતા અને અખંડિતતાનું ઉત્તમ ઉદાહરણ - ભારત

       આપડે લોકો જે ભારત દેશ ઉપર ગર્વ અનુભવીએ છીએ તેનું એક કારણ એ છે કે અહીં વિવિધતા હોવા છતાં એકતા છે. આપડા દેશમાં કેટલા બધા લોકો વિવિધ ધર્મો પાળે છે તે તેમનો વ્યક્તિગત વિષય છે, તે તેમનું ગર્વ છે, તે તેમની શ્રદ્ધા છે. પરંતુ આ વિવિધ ધર્મો પાળતો સમાજએ આજ આઝાદી ના 75 વર્ષ પછી કેવો છે એનો એક નાનકડો કિસ્સો મારી નજરે પડેલ જે હવે આપની નજર સુધી પહોંચાડવાનો આ એક પ્રયત્ન છે. 

         આપડે બધા કોઈ ને કોઈ ધર્મ, સમાજ, સંસ્કૃતી નાં માણસો છીએ કોઈ કહે છે હું હિંદુ છું કોઈ મુસલમાન, કોઈ બોદ્ધ, તો કોઈ સિખ, ઈસાઈ બધાનાં ધર્મો અલગ છે. બધાની પ્રાથનાની રીતો અલગ છે. પરંતુ તો પણ આપણે આ દેશ ઉપર ગર્વ લઈએ છીએ કે અહીં આટલી બધી વિવિધતા હોવા છતાં એકતા છે. શું આ સાચી વાત છે ? જો મને કોઈ આવો પ્રશ્ન કરે તો મારો જવાબ છે હા. અને હા તો એ કઈ રીતે એ પ્રશ્ન થવો સ્વભાવિક છે. અને એવા બધા પ્રશ્નોનાં જવાબ એ એક કિસ્સા દ્વારા જણાવીશ. 

       લગભગ 5 - 7 દિવસ પહેલા અમદાવાદ થી પોરબંદર જતા રસ્તા માં હું ઊંઘી ગયો થોડા સમય બાદ જ્યારે આંખ ખુલી તો બારી થી એક દ્રશ્ય આંખે પડ્યું એક BAPS નાં નવનિર્મિત સ્વામિનારાયણ મંદિર ની 7 ટોંચ ઉપર ભારત દેશનો રાષ્ટ્ર ધ્વજ લહેરાતો હતો. પછી તો ફોટો પાડવાનુ ઘણું ખરું મન તો થયું પરંતુ એટલામાં બસ આગળ ચાલી નીકળી હવે મનમાં એક આ વિષયે પ્રવેશ લીધો કે એવા કેટલા ધાર્મિક સ્થળો છે જ્યાં પોતાના ધર્મ ના ધ્વજની સાથે રાષ્ટ્ર ધ્વજ ફરકી રહ્યો છે. અને આ માહિતી ચોંકાવનારી હતી. ઘણા મંદિરો, મસ્જિદો, અને બીજા ધાર્મિક સ્થળો એ પણ રાષ્ટ્ર ધ્વજ ને લહેરાતો જોઈ ને ગર્વ અનુભવી રહ્યો હતો. હવે કોઈ મને પ્રશ્ન કરે કે ભારત દેશ માં વિવિધતા માં એકતા કઈ રીતે છે તો આ રહ્યો મારો અનુભવ આના આધારે ગર્વ થી કહી શકું કે હા મારા દેશ માં એકતા છે. અલગ - અલગ ધર્મ પાળતા લોકો એ પોતાના ધર્મ ની પહેલા રાષ્ટ્ર ને પોતાનો ધર્મ માને છે.

       લાગે છે કે ડો. બાબા સાહેબ આંબેડકરનાં વિચાર

 "We are Indians, firstly and lastly." પર આજે આપણે ખરા ઉતર્યા છીએ એ બદલ ગર્વ અને હર્ષ ની લાગણી છે.

ફૂટપાથ

ફૂટપાથ

વિષય કંઇજ નવો નથી આપણે લોકો રોજે જેના વિશે સાંભળતા હોઈએ જેને દરોજ ઉપયોગમાં લેતા હોઈએ એવો વિષય છે ફૂટપાથ.

આમ સામાન્ય પણે જો ફૂટપાથની ની વ્યાખ્યા કરવી હોઇ તો આપણે કહી શકીએ કે "શહેરમાંના મોટા રસ્તાઓની બંને ધાર ઉપર માણસોને ચાલવા માટેની ફરસબંદીવાળી પગથી". પરંતુ શાયદ હવે આ વ્યાખ્યાને થોડી બદલવાની જરૂરત અનુભવાઈ રહી છે. કેમકે હવે ફૂટપાથ નું  કામ એ માત્ર માણસ ને ચાલવા પૂરતું સીમિત નથી રહયું ફૂટપાથના વિભિન્ન ઉપયોગો માનવે શોધી કાઢ્યા છે. ટ્રાફીક વધુ હોઇ તો ફૂટપાથ પરથી પોતાનું વાહન કાઢી શકાય, ઊંઘવા માટે સ્થળ ન હોઈ તેવા સંજોગોમાં ફૂટપાથ પર ઓપન હોટલની મજા માણી શકાય, દુકાનના ખર્ચ ને બચાવવા પોતાની લારી ફૂટપાથ પર લાવી વ્યાપાર કરી શકાય, અને આજેજ એક સરસ નવો ફૂટપાથનો ઉપયોગ મને એ શીખવા મળ્યો કે પોસ્ટર હોલ્ડિંગસ પણ ફૂટપાથ પર લગાવી જ શકાય છે.

હવે નવી ફૂટપાથની વ્યાખ્યા આપણે આમ કરીએ તો ચાલે કે "વિના લાગતે પોતાનું કામ સંકટો વિના સરળ રીતે કરવાની રોડ ની બને બાજુ અપાયેલી જગ્યા એટલે ફૂટપાથ." ફૂટપાથ એ કોઈ જાત- ભાત, અમીરી - ગરીબીનો ભેદ જોયા વગર બધાને કામ લાગે છે. કોઈ વ્યક્તિ ચાલવા માટે, કોઈ ગરીબ ઊંઘવા માટે, કોઈ મધ્યમ વર્ગનો વ્યક્તિ પોતાના વ્યાપાર માટે, તો કોઈ અમીર વ્યક્તિ હોલ્ડિંગ લગાવી પ્રચાર માટે ફૂટપાથ માટે બધા સમાન છે. અને બધા ફૂટપાથનો ઉપયોગ કરેજ છે.

PP - પશુ અને પ્લાસ્ટીક

તારીખ - 30- 07-2022

વાર - શનિવાર

  ફોટોગ્રાફ - ભાર્ગવ મકવાણા

વાડજ: એ.એમ.ટી.એસ. બસ સ્ટેન્ડ બહાર સરકાર શ્રી દ્વારા કચરા પેટી મૂકવામાં આવેલ છે અને તે તદન ખાલી જોવા મળી અને તેજ કચરાપેટી નીચે પ્લાસ્ટિકની કોથળીમાં કોઈ ખાવા ની સામગ્રી કોઈ ફેંકી ને ચાલ્યું ગયું એ ખાવાની સામગ્રી ની ગંધથી ત્યાં એક ગાય ને મે તે પ્લાસ્ટિક ખાતા જોય. હા હોઈ શકે કોઈક ને મોડું થતું હોઈ અને જલ્દી માં કચરો તેમજ ફેંકી ને ચાલ્યા ગયા હોય પણ આ જલ્દી ને લીધે આવા પશુઓ પ્લાસ્ટિક ખાય છે અને ગંભીર રોગ કે મૃત્યુ પામે છે. આવી નાની- નાની વાતો ના લીધે કેટલીક ગંભીર સમસ્યાઓ જન્મ લેતી હોય છે. 

 આપણી વિડંબના તો જૂઓ આવા દ્રશ્યો જ્યારે આંખો સમક્ષ આવે ત્યારે ખરેખર માનવની માનવતા પર પ્રશ્ન થાય એ સ્વભાવીક છે.